Муус устар 27 күнүгэр Өлтөх сиригэр уотугар Өрөспүүбүлүкэбит күнүн өрө көтөҕүүлээхтик көрүстүбүт.
Кэлбит ыалдьыттары саха сиэринэн боҕуркоскай отунан сыт таһааран, арыылаах алаадьынан айах тутан көрсүү ыытылынна.
Өрөспүүбүлүкэбит былааҕын олохтоох баһылык Константин Анатольевич Алексеев, ону тэҥэ өр сылларга үлэлээбит аҕа баһылыкпыт, муниципальнай сулууспа туйгуна бэлиэ хаһаайына Николай Николаевич Сивцев өрө күөрэттилэр. Ол кэмҥэ Саха сирин өрөгөйүн ырыата ылланна.
Аҕа баһылык К.А.Алексеев бар дьонун эҕэрдэлээн тыл эттэ.
Сахабыт сиригэр анаан айбыт, биир дойдулаахтарбыт суруйбут хоһоонноруттан, Ирина Гаврильевна Алексеева салайааччылаах, А.Н.Жирков аатынан Бэйдиҥэ орто оскуолатын 4 кылааһын үөрэнээччилэрэ доргуччу аахтылар.
Зоя Иннокентьевна Шепелева олохтоох оһуохайы таһаарда, Игнатий Васильевич Слепцов оһуохайы оройуттан туттубут.
Киэһээҥҥи өттүгэр Арыылаахха, ол кэннэ киэһээ 8 чааска икки сиринэн сылдьан «Үҥүүлүүр Өлтөх» диэн кэнсиэри туруоран бар дьоммутун сэргэхситтибит.