🌏📰📌🔎 СЭРГЭХ СОНУННАР:
Соргу дугуй, барҕа баардый!
Бүгүн ахсынньы ый 19 күнэ, оптуорунньук
🆕 Турцияҕа түөрт энергоблоктаах «Аккую» диэн бастакы атомнай станция бастакы блога үлэҕэ киирэргэ бэлэмин туоһулуур көҥүлүн (ввод в эксплуатацию) ылла. Бу айдааннаах станцияны тутуу 2010 сылтан саҕаламмыта — ол сахтартан Европа Турцияҕа утарыласпыта, буолаары буолан Арассыыйалар туталлар диэн сөбүлээбэтэхтэрэ. Бу станция хапытаалын 51 бырыһыанын «Росатом» үөскэппит «Аккую» диэн хампаанньата бас билэр. Арассыыйаҕа бу тутууну эмиэ сэргээбэтэхтэрэ, тоҕо диэтэр дуогабар быһыытынан тутууга Турция хампаанньалара уонна олохтоох нэһилиэнньэттэн үлэһиттэр эрэ ылыллыахтаахтар диэн этэ. Ол иһин Арассыыйа профессионал, атомҥа сыһыаннаах үлэһиттэри наймылаһаары буор босхо тыһыынчанан турогу үөрэттэрбитэ. Уопсайынан Дуогабары үчүгэйдик аахтахха Арассыыйа туох да улахан барыыһы аахсар кыаҕа суох, сүрүн билиитин-баайын атын дойдуга буор босхо уларсар курдук балаһыанньалаах эбит. Ол эрэн «Аккую» станция толору үлэтигэр киирдэҕинэ Турция энергетикэҕэ наадыйыытын 10 бырыһыанын хааччыйыахтаах. Ол иһин Европа утарсар — Арассыыйа Турцияны энергетическэй «иҥнэҕэ» (тутулуктаныыга) олордор дии саныыллар.
🆕 Космос куйаарыгар көтө сылдьан Сир кыраадыһын мээрэйдиир «HotSat-1» спутник бүтэһик кэмнэргэ саамай чопчу көрдөрөр тепловизор быһыытынан биллэрэ да, икки ый көтөн баран камерата ыһыллан хаалла. Көтүппүт Аангылыйа учуонайдара туох буолбутун билбэттэр. Бу термометр куйаартан көтө сылдьан сиргэ ханнык абыйыак төһө кыраадыс сылыйарын быһаарар инфракраснай камералаах этэ — ол камерата 3.5 миэтэрэҕэ тиийэ кыра объегы таба көрөн кыраадыһын быһаарар үһү. Сыала-соруга — ититиини кэмчилиир наадаттан сылааһы куоттарар дьиэлэри булуу диэн этэ да, Арассыыйа эспердэрэ сэриигэ эмиэ тутталлар диэн сабаҕалыыллара. Кыраҕыны көрөр камера үлэлии турар мотуордаах байыаннай тиэхиньикэни, төһө да саспытын иһин, тепловизор курдук үөһэттэн курдары көрөр кыахтаах этэ дииллэр.
🆕 Евросойуус саансыйа 12 бакыатын бигэргэттэ. Бу сырыыга кытаанах ирдэбиллэри кытары кыракый сымнатыылар эмиэ бааллара билиннэ. Сүрүн тосхоллорго тохтоотоххо:
- Арассыыйаттан алюминий оҥоһуктарын (фольга, боробулуоха) атыылаһары боптулар;
- Ыгыллыбыт пропан диэн гааһы атыылаһары боптулар;
- Оҥоһуллубатах, кырыыламматах алмааһы атыылаһары боптулар;
- Уонна саамай сүрүнэ, Европа бэйэтин бородууксуйатын атын дойдуларга атыылыырыгар ол дойду Арассыыйаҕа биэрбэтин курдук дуогабар түһэрсэн атыылыырга ирдэбил туруордулар, ол аата параллельнай импорпытын саба сатыыллар.
Сымнатыылар үксүн Арассыыйаттан тахсар дьон бэйэ таһаҕастарыгар сыһыаннаах уонна дипломатическай сыһыаннаһыыларга бэйэ тиэхиникэтин туттары көҥүллээтилэр.
🆕 Арассыыйаҕа саҥа төлөпүөн сүрэхтэннэ — Р-Фон. Бу төлөпүөнү операционнай систиэмэтин Арассыыйаҕа оҥорбуттар. Ол эрэн, иһинээҕитэ туохтан турарын анааран бардахха, үгүс дойдулар кыттыгастаахтара биллэн тахсар. Төлөпүөн син кыахтаах тэриллэргэ киирсэр, оперативнай өйө 8 гб тэҥнэһэр, бэйэтин иһигэр 128 гб миэстэ, слот быһыытынан 2 тб миэстэ эбиллиэн сөп. Үгүс төлөпүөн эспиэрдэрэ эмиэ да Бангладешка оҥоһуллар Symphony Helio 80 диэн моделлаах төлөпүөҥҥэ майгыннаталлар, эмиэ да Bopel Mobile Technology диэн Кытай хампаанньата оҥорор тэрилигэр холууллар. Төлөпүөнү оҥорон таһаарбыт «Роса-Мобайл» хампаанньа дириэктэрэ этэринэн, төлөпүөн быһа холоон 40 тыһыынча солкуобайга тэҥнэһэр үһү. Сонун аллараа комментарийдарын аахтахха, ити кэриэтэ 40 тыһыынчалаах Кытайтан өссө ордук төлөпүөнү булуохпут этэ дэһэллэр. Санаттахха «Аврора» диэн операционнай систиэмэлээх Арассыыйа төлөпүөнэ эмиэ сыаната бэрдин иһин ким да атыыласпакка, бырабааллаабыт сурахтааҕа.
🆕 «Алта» диэн кинигэ кыһата көҕүлээһининэн, Ил Түмэн урукку дьокутаата, урбаанньыт Руслан Федотов үбүлээһининэн тэриллибит оҕоҕо аналлаах айымньы күрэҕэ түмүктэннэ. Бу үлүгэр 500 тыһыынча солкуобай бириистээх күрэххэ баара-суоҕа 16 эрэ үлэ киирбитэ дьиибэтик иһиллэр. Онтон сүүһүнэн ааҕыллар айар куттаах доҕотторбут ханна бардыларый, оҕо литературатыгар холонон да көрбөттөр эбит да? Аһара улахан сууммалаах күрэххэ син биир кыайыа суохпут диэн санамматахтара даҕаны дуу? Дьэ ол 16 үлэттэн чорботон Санкт-Петербург куоракка үөрэнэ сылдьар устудьуон кыыс Валерия Потапова «Бастакы Сээн» диэн фэнтези сэһэнэ кыайда. Ону таһынан Ангелина Васильева «Аптаах таас», Николай Бурнашев «Үстүөпэ сырыылара» Любовь Матвеева-Сүүмэх «Дойдулаах оҕо» уонна Екатерина Захарова «Сайын» айымньылара оҕолорго аналлаах кинигэ буолан тахсарга биһирэннилэр.
Ыра санааны ыраҥалыыртан сылайбыт буоллаххына, ыл да толорон кэбис! Ситиһиини!
Сонуннары тистэ, тылбаастаата:
ДьолуКуус
