🌏📰📌🔎 СЭРГЭХ СОНУННАР:
Соргу дугуй, барҕа баардый!
Бүгүн ахсынньы ый 14 күнэ, чэппиэр.
🆕 Учуонайдар сүбэлииллэр — ытырдары тута сатаамаҥ. Ытырдар кэмҥэ киһи тыҥатыгар сөкүүндэҕэ 120 миэтэрэ түргэтиир салгын үөскүүр эбит. Ону туттаххына, баттааһын түмүгэр түргэтээһинэ хас да бүк эбиллиэн сөп үһү. Бу соторутааҕыта биир эр киһи ытырдыытын тутан трахеятыгар 2 миллиметрдаах дьөлөҕөс үөскэппит, хата анал эпэрээһийэтэ суох бааһа бэйэтэ оспут. Онон төһө кыалларынан ытырдыҥ, уопсастыбаннай миэстэҕэ сылдьар буоллаххытына салгын аһарар былатыагынан, салпыакканан, муҥутуур уһукка кэтэ сылдьар таҥаскытынан бүөлэниэххитин сөп диэн сүбэлииллэр.
🆕 Кулун тутарга буолар Быыбар туһунан кэпсэтиилэр күн-түүн эбиллэн иһэллэр, бу сырыыга Быыбарга төһө харчы барарын суоттаабыттар. Өскөтүн 2018 сыллаах быыбарга 17,7 миллиард солкуобайы бараабыт буоллахтарына, кэлэр 2024 сылга 33,2 миллиард солкуобайы туттуох чинчилээх эбиттэр. Онтон 32,8 миллиард солкуобайа аҥардас миэстэлэринэн быыбардыыр хамыыһыйалар үлэлииллэригэр анаммыт, 170 мөлүйүөн — олохтооҕу учуоттуур уонна регистрациялыыр судаарыстыбаннай уорганнарга, 217 мөлүйүөн киин Избирком болонумуочуйатын толороругар туһуламмыт үһү.
🆕 Калининград уобалаһыгар бэрт дьикти түгэн тахсыбыт. Бу сайын от ыйыгар, дьиэтигэр соҕотох олорор 84 саастаах пенсионерка биир эр киһилиин билсэн, хонор сирэ суоҕун иһин аһынан, дьиэтигэр хонноро киллэрбит. Хас да күн буолбутун кэннэ эр киһи туох соруктаах кинилиин билсибитин дьэ билиммит. Кини наймыламмыт өлөрүөхсүт, эмээхсини тыынын быһаары кэлбит эбит. Эрээри, бу билсэн баран аһынным, өлөрүөхпүн баҕарбаппын, ол эрэн сакааһы тохтоторбор миэхэ 60 тыһыынча солкуобайы биэр диэбит. Эмээхсиммит ону итэҕэйбит, уурунуутун барытын эр киһи иннигэр олордон биэрбит. Дьэ бу соторутааҕыта ол барыта билиннэ — «өлөрүөхсүппүт» баара-суоҕа ускул-тэскил сылдьыбыт 65 саастаах бомж эбит, эмээхсин итэҕэймтиэтин туһанан харчытын сойботон ыларга санаммыт үһү.
🆕 Эбээн уус-уран литературатын төрүттээччи Николай Тарабукин 1935 сыллаахха уһуллан хаалбыт куолаһын уонна саҥатын ХИФУ учуонайдара сыыппараҕа көһөрөн киэҥ эйгэҕэ иһитиннэриэхтэрэ. Үөрэх кыһатын пресс-сулууспата этэринэн, бу устууга Николай Тарабукин бэйэтэ айбыт икки ырыатын толорор, уонна саамай сүрүнэ — эбээн тылынан. Оччоҕо бу устуу — эбээн тылынан уһуллан хаалбыт аан бастакы аудиоматырыйаал буолан тахсар диэн киэн тутта этэллэр.
🆕 Бүгүн киэһэ үгүс федеральнай ханаалларынан бэрэсидьиэммит Владимир Путин улахан, сыллааҕы пресс-конференцията аһаҕас биэрии быһыытынан буолуоҕа. Суоттуулларынан үс чаас кэриҥэ ыйытыыларга хоруйдуоҕа. Суруналыыстар ыйытыылар улахан аҥардара Анал Байыаннай Дьайыы туһунан, иккис улахан ыйытыы — үлэһит каадырдар тиийбэттэрин хайдах өйүүр миэрэлэри ылар туһунан буолуоҕа, медицина уонна үөрэх чааһа элбэхтик көтөҕүллүөҕэ дииллэр. ЯСИА Саха сирин дьонуттан «Путинтан тугу ыйытыа этигитий» диэн интервью ылбыттарыгар Өлүөнэ күргэтэ болдьоҕор тутуллан бүтүө дуо, саансыйаларынан сылтаан урбаанньыттарга туох эмэ көмө көрүллүө дуо уонна АБДь хаһан бүтэр чинчилээҕий диэни ыйытыа этибит диэбиттэр.
Барытын бэйэм эрэ оҥоруохтаахпын диэн санаанан салайтардаххына, салгыы үлэлииргэр быдан чэпчэки буолуо! Ситиһиини!
Сонуннары тистэ, тылбаастаата:
ДьолуКуус