Ахсынньы ый 1 күнүгэр Афанасий Прокопьевич Петров аатынан Бэйдиҥэтээҕи норуот айымньытын киинин дьиэтэ 55 сылын бэлиэтии уус-уран самодеятельность кыттыылаахтарын түмэр күнэ буолан ааста.
Тэрээһин үөрүүлээх чааһыгар Өлтөх нэһилиэгин дьаһалтатын баһылыгын солбуйааччыта Ирина Спартаковна Сивцева, Өлтөх нэһилиэгэр 20 сыл устата баһылыктаабыт, СӨ муниципальнай сулууспатын туйгуна Николай Николаевич Сивцев, СӨ култууратын туйгуна, култуура бэтэрээнэ Мария Николаевна Никонова, Бэйдиҥэтээҕи модельнай библиотека сэбиэдиссэйэ Матрена Иннокентьевна Никонова, улуус нэһилиэктэрин кулуубун директордара бэйэлэрин эҕэрдэлэрин тиэртилэр. Директор Игнатий Васильевич тэрээһиннэргэ күүс-көмө буолар дьоннорго, кружок кыттыылаахтарыгар махтал суруктары, саҥа тахсыбыт буклеты кружок салайааччыларыгар туттарда. Ол кэннэ А.П.Петров аатынан Бэйдиҥэтээҕи норуот айымньытын киинин уус-уран самодеятельность эҕэрдэ кэнсиэрэ саҕаланна. Кэнсиэр кэннэ норуот айымньытын кыргыттара бэлэмнээбит сандалы остуол тула санаа атастаһан, кэпсэтэн, күлэн-оонньоон, уруккуну ахтыһан, бырааһынньыктааҕы торт амсайан, үҥкүүлээн бары астына тарҕастылар. Тэрээһин үрдүк таһымнаахтык ааста диэн сылдьыбыт дьон астына кэпсээтилэр. Бу курдук өссө да түмсүүлээх буолуоҕуҥ, бары доруобуй, дьоллоох буолуҥ.
Сонуннарга анаан Өлтөх олохтоох прессата.
