🌏📰📌🔎 СЭРГЭХ СОНУННАР:
Соргу дугуй, барҕа баардый!
Бүгүн ахсынньы ый 20 күнэ, сэрэдэ.
🆕 Амыарыкаҕа аҕыйах хонуктааҕыта күүстээх торнадо түһэн улахан хоромньуну таһаара сырытта. Теннеси штат Кларксвилл диэн куоратын киин уулуссаларынан эрийэн-буруйан ааспыт. Дьиктитэ диэн, төһө да Амыарыка торнадо дойдутунан билиннэр, Теннеси диэн штатка хаһан да торнадо түспэтэх эбит, ол иһин идэлэринэн дьиэлэрэ хортуоҥка аҥардаах буолан, барыта кэриэтэ күүдэпчилэнэ көппүт. 6 киһи суорума суолламмыта биллэр, ол да үрдүнэн дьикти быыһаныы эмиэ баар — торнадо кэлээскэҕэ утуйа сыппыт оҕону эмиэ көтүтэн таһаарбыт. Төрөппүттэрэ ситиһэн сатаан быыһаабатахтар, улахан оҕолоро көтө сыспытын нэһиилэ тохтоппуттар. Кэлээскэ холорук сүүрүгүн хоту эргийтэлээн баран, тыалыгар бэриммэтэх маска тиийэн сыбаммыт. Дьоллоругар оҕо туох да буолбатах, арай сүүһүгэр кыракый дьүккүрүйүү баар эбит.
🆕 Эмиэ биир айылҕа катаклизма хотугу Европаҕа уһугунна. Киһи сатаан ааттаабат Фаградальсфьядль вулкан төлөннөөх лаабатынан өрө тыбыырда. Эргимтэтигэр сир хайдыыта 3.5 километрга тиийдэ, билигин лаава сөкүүндэҕэ 100-200 кубичеескэй метр түргэннээх устан иһэр. Этэллэринэн бүтэһик үс сылга бу вулкаммыт саамай уохтааҕа, күүстээҕэ эбит. Эмиэ сөмөлүөттэр көтөллөрүгэр харгыстыа диэн дойду саламтата ыксаллаах быһыыга-майгыга бэлэмнэнэр. Уопсайынан сир шаар үрдүнэн сир хамсааһыннара бу кэлиҥҥи күннэргэ олус элбэхтик бэлиэтэннилэр, ол курдук Сахалин, Камчатка курдук сирдэрбитигэр 4,7 магнитудалаах сир хамсааһыннара тахса сылдьыбыттар. Арассыыйабыт орулуур ортотугар — Кузбасс оройуонугар эмиэ сир хамсааһына бэлиэтэммит, магнитудатын 4,4 баал дииллэр.
🆕 Астра диэн сулус, логос диэн үөрэх буоллаҕына, Астрология — сулустар үөрэтэр наука буолбатах, сулустар тугу сипсийэллэринэн дьон күннээҕи олоҕун-дьаһаҕын салайтарынар сүбэ холбуката курдук буолбута ыраатта. Арассыыйа наукатын академията Астрологияны — сымыйа наука кэккэтигэр киллэрдэ уонна дуоспуруннаах хаһыаттар, СМИ тэрилтэлэрэ астрологиянан үлүһүйбэттэригэр сүбэлээтэ. Астрология диэн общество феномена, дьон күннээҕи олохторун гороскобунан салайтарар буолан эрэллэр, онтон сылтаан медицинскэй да ирдэбиллэри толорбокколор, бэйэлэригэр куһаҕаны оҥостоллор диэн түмүк санааны эттилэр.
🆕 Дьэ били Госдуума бэлэмнээбит сокуон бырайыагар Путиммыт илии баттаабыт. Аны оскуолаҕа оҕолорбут уруок кэмигэр төлөпүөнү туһаныа суохтара. Ити бырайыакка эбии маннык тосхоллор киирбиттэр:
- Оскуола иһигэр бэрээдэги тутуһуу таһынан дисциплина ирдэбиллэрэ күүһүрүөхтэрэ;
- Учууталларга убаастабыллаахтык сыһыаннаһыы бырааба күүһүрүө, кини физическай уонна психическай күүһүмтүйүүттэ көмүскэллээх буолуоҕа;
- Бырабыыталыстыба уонна регионнар педагогтарга эбии көмө харчы биэриэхтэрин сөбүн көҥүллээтилэр;
- Алын уонна орто кылаас оҕолоругар «Труд» уруога төннүөҕэ — кэлэр сыл балаҕан ыйыттан бары оскуолаларга эбээһэтэлинэй буолуоҕа.
🆕 Кэлэрэ 2024 сылга Саха сирин үрдүнэн биир кэлим физкультурно-оздоровительнай уонна спортивно-маассабай тэрээһиннэр былааннарын тосхоло бигэргэннэ. Эһиил барыта холбоон 608 араас таһымнаах спортивнай күрэхтэр буолан ааһыахтарын торумнастылар. Быйылгыны кытары тэҥнээтэххэ, көрдөрүү син элбэх, быйыл 555 тэрээһин ыыттыллыбыт (ыытыллара былааннанар), онно 200 тыһыынча киһи кыттыбыта биллэр. Эһиил, биллэн турар сүрүн болҕомтону Саха сиригэр буолар «Дети Азии» оонньуу улахан кэрчиги ылар буолуохтаах, манна сир дойду араас муннуктарыттан барыта холбоон 3 тыһыынча күрэхтэһээччи, аҥардас күрэхтэһээччитэ эрэ 3 тыһыынча ыалдьыт кэлэрэ былааннанар.
Былыргыны былыт саппыта диэн өс хоһоон баар, ол киһи инникинэн олоруохтааҕын, үрдүккэ-кэрэҕэ дьулуһуохтааҕын бэлиэтиир. Былыргыны былыт саппыта, саҥаны арыйар саҕахха талаһыах! Ситиһиини!
Сонуннары тистэ, тылбаастаата:
ДьолуКуус