Балаҕан ыйын 29 күнүгэр Өлтөх нэһилиэгин уус-уран самодеятельноһын кыттыылаахтарын Саха национальнай көрдөрөр иһитиннэрэр компания «Айар-тутар Сахам сирэ» телепередачатыгар Тулагытааҕы М.П.Обутова-Эверстова аатынан култуура киинигэр уһуллулар. «Эйгэ» сынньалаҥ киин уус-уран салайааччыта Александра Саввина баай опыттаах буолан быйылгы үлэ сезонугар уус-уран самодеятельность кыттыылаахтарын хомуйа тардан түмсүүлээхпит көһүннэ. Айаҥҥа турунарбытыгар көрдөһүүбүтүн быһа гыммакка Павел Сивцев, Юлия Говорова, Михаил Находкин, Валентина Лугинова, Спиридон Алексеев түргэн сырыылаах, сымнаҕас олбохтоох массыыналарынан баран кэлбиппитигэр кыттааччылар ааттарыттан улахан махталбытын тиэрдэбит. Ырыаһыттарбыт Анна, Иннокентий Артамоновтар, Кондратий Герасимов, Любовь Кудрина, Юлия Говорова, Айтал Карамзин, Игнатий Слепцов, «Ырыам уонна сибэкки» вокальнай ансамбль, үҥкүүһүттэр Владислав, Вячеслав Яковлевтар, «Кустук» оҕо үҥкүүтүн солистара Варя Черемкина, Дохсун Оконешников, Руслан Сивцев, «Дэгэйик», «Кэрэкэм» үҥкүү бөлөхтөрө,»Дьыл кэмэ» сахалыы, аныгылыы муода көрдөрүү, кэнсиэри ыытааччы Валентина Лугинова өр сылларга үйэтитиллэр НВК фондатыгар киирэр биир туспа үлэ буоларын өйдөөҥҥүт кыттыыны ылбыккытыгар истиҥ махталбытын биллэрэбит. Салгыы Өлтөх нэһилиэгин уус-уран самодеятельноһа сайда-үүнэ турдун, быйылгы дьылга Арыылаах бөһүөлэгэ тэриллибитэ 100 сылын көрсө ыытыллар тэрээһиннэргэ өссө күүскэ үлэлиэҕиҥ, айыаҕыҥ-тутуоҕуҥ! «Эйгэ» с.к.
