Өлтөххө нэһилиэк историятыгар улахан суолталаах икки кинигэ сүрэхтэннэ.
Афанасий Прокопьевич Петров аатынан Бэйдиҥэтээҕи норуот айымньытын киинигэр Марфа Одорусова «Сэрии тыына-Өлтөххө» уонна Марфа Одорусова, Ангелина Говорова-Татаринова таһаарбыт «Өлтөххө кыайыылаахтар эрэллэрэ, утумнааччылара» кинигэлэр сүрэхтэниилэрин дьоро күнэ буолла.
Тэрээһин «төгүрүк остуолугар» санаа атастаһыыта бэрт истиҥник, долгутуулаахтык ааста. Кыттааччылар бэчээттэммит кинигэлэр Өлтөх нэһилиэгин историятыгар улахан суолталаахтарын, нэһилиэкпитигэр олорон ааспыт дьон кэнчээри ыччаттарыгар өйдөбүлгэ хаалар историческай түгэн буоларын бэлиэтээтилэр.
