Бэс ыйын 29 күнүгэр, Уус Алдан улууһун, Бэйдиҥэ сиригэр-уотугар эдэр кэскиллээх саха сирин суруйааччыларын «Айаар аартыкпыт аргыстара» түмсүү ыалдьыттаан ааста. Эдэр кэскиллээх айар дьоҕурдаах ыччат Бэйдиҥэ кэрэ көстүүлээх айылҕатын, айылҕа анаан үүннэрбит ураты Үс Бэһин, күлүмүрдүү долгуннурар улаҕата көстүбэт Бэйдиҥэ эбэ киэҥ байҕалын, сибиэһэй ыраас мүөттээх салгынын түөстэрин муҥунан тыынан, астынан, үтүөнү эрэ өрө тутар, аламаҕай майгылаах дьонун-сэргэтин кытта көрсөн, бэйэлэрин талба талааннарын көрдөрдүлэр. Киэһээҥҥи өттүгэр А.П.Петров аатынан Бэйдиҥэтээҕи норуот айымньытын дьиэтигэр түмсэн, бу соторутааҕыта күн сирин көрбүт «Сааскы ыллыктар» диэн кэпсээннэрин хомуурунньугун сүрэхтээтилэр, Өлтөх олохтоохторугар ырыа-тойук кутуллар дуораанын, истиҥ эҕэрдэлэрин тиэртилэр. Кэнсиэр кэннэ Бэйдиҥэтээҕи олохтоох модельнай библиотекаҕа ыалдьыттаатылар, библиотека Аал Луук маһыгар бэйэлэрин кэлэн ааспыт бэлиэлэрин салама иилэн хааллардылар, олохтоох библиотекаҕа «Сааскы ыллыктар» кинигэлэрин бэлэх ууннулар. Библиотека сэбиэдиссэйэ Никонова Мотрена Иннокентьевна ыалдьыттарбытыгар саҥа модельнай библиотека историятыттан, Өлтөхтөн төрүттээх биир дойдулаахтара таһаарбыт кинигэлэрин выставкатын оҥорон кэпсээтэ, олохтоох суруйааччыларын туһунан сырдатта. «Айар аартыкпыт аргыстара» суруйарга холонор эдэр ыччат холбоһуга дьиҥ-чахчы анал регистрациялаах общественнай тэрилтэ буолар. Кылгатан суруллуута «Айарт». «Айарт» түмсүү салайааччытынан Диана Викторовна Сутакова — Дайаана Куо буолар. Бу түмсүүгэ сахабыт сирин араас улуустарыттан сүүстэн тахса эдэр ыччат баар. Уус Алдан улууһуттан бу түмсүүгэ Катя Готовцева, Анатолий Кириллин, Борис Борогонскай, Анна Колосова, Игнатий Слепцов бааллара биллэр.
Түмсүү урукку сылларга Хаҥалас улууһугар, Хаҥалас хаспахтарынан саха биир биллэр номоххо кэпсэнэр Тыгын Дархан сиригэр-уотугар сайыҥҥы сынньалаҥнарын атаарар эбит буоллахтарына, быйыл уус тыллаах саха уутуйан үөскээбит Уус Алдан улууһугар, номоххо киэҥник биллэр саха омук төрдө буолбут Лөгөй Тойон дойдутугар ыыр үктээтэ, кэлэр сылларга Бүлүү бөлөх улуустарынан барар баҕа санаалаахтарын туһунан сырдаттылар. Уус саха омуга уйгулаах сирэ-дойдута, дьоно-сэргэтэ далбар сандалылаах, итии чэйдээх көрсүбүккүтүгэр олуһун диэн үөрбүт үөрүүлэрин тэҥҥэ үллэстэллэр, Өлтөх сирэ өрүү өйдөбүлгэ хаалла диэн барҕа махтал тылларын тиэрдэллэр.
Соннуннарга анаан сырдатта Өлтөх олохтоох прессата.
