Саха Өрөспүүбүлүкэтин күнүн көрсө, үөрүүлээх тэрээһиҥҥэ кыттыыны ыла кэлбит бар дьоммутун сахалыы сиэринэн «Дьүөгэ», «Эдэр ийэлэр» түмсүү кыргыттара боҕоруускай отунан сыт таһааран, арыылаах алаадьынан айах тутан көрүстүлэр.
Саха Өрөспүүбүлүкэтин былааҕын күөрэччи таһаардылар Өлтөх нэһилиэгин Аҕа баһылыга Константин Анатольевич Алексеев уонна Уус-Алдан улууһун баһылыгын дьыалатын салайааччы Гаврил Гаврильевич Тимофеев.
Саха автономията төрүттэммитэ 100 сылынан Константин Анатольевич, Гаврил Гаврильевич эҕэрдэлэрин этэн наҕараадалары туттардылар. Тэтим эдэр ыччат үҥкүү ансаамбыла, Эр дьон түмсүүтэ эҕэрдэ хоһоонунан бырааһынньыгы киэргэттилэр. Оскуола оҕолоро флешмобтаатылар. Түмүккэ оһуохай түһүлгэтэ буолла, оһуохайы Мария Александрова, Мария Говорова, Игнатий Слепцов таһаардылар.
Өлтөх нэһилиэгэр Арассыыйаҕа «Норуоттар култуураларын нэһилиэстибэтин сылынан», «Саха АССР тэриллибитэ 100 сылынан» уран-тарбахтаахтар бар дьоҥҥо-сэргэҕэ саҥа истиҥ, ханна да хатыламмат ураты-уран, баай көстүүлээх оҥоһуктары Бэйдиҥэтээҕи норуот айымньытын киинигэр аҕалан бүгүҥҥү түөнэ-мааны түһүлгэбитин киэргэттилэр. «Эйгэ» сынньалаҥ киинигэр «Өбүгэ ситимэ» былыргы мал-сал, туттар тэрил, иһит-хомуос, киэргэл быыстапката тэрилиннэ. Барыта 43 киһи кыттыыны ылла.
«Таптыыбын төрөөбүт дойдубун» диэн Өлтөх нэһилиэгин бырааһынньыктааҕы эҕэрдэ кэнсиэрэ. Кыттыыны ыллылар «Сардаҥа» бальнай үҥкүү коллектива, «Дэгэйик», «Дьүөгэ» үҥкүү коллективтара, «Ырыам уонна сибэкки» вокальнай ансаамбыл, «Чобуо» чабырҕахсыттар бөлөхтөрө, «Айуу-чэ» көр-күлүү бөлөҕө, Анна, Иннокентий Артамоновтар уо.д.а.