Афанасий Прокопьевич Петров аатынан Бэйдиҥэтээҕи норуот айымньытын киинэ суоппардар күннэрин уратытык бэлиэтээтэ. Ол курдук, норуот айымньытын киинин уус-уран салайааччыта Майя Иннокентьевна Аржакова “Өлтөх суоппардара” диэн кинигэтин сүрэхтэниитэ буолла.
Өлтөх нэһилиэгэ үлэ хайа да салаатыгар өрүү бастыҥ дьонунан-сэргэтинэн, новатордарынан инники күөҥҥэ сылдьара. Кэмигэр тиэниллибит от-мас, муус, оҕунуох, чох, уотурба пятилетка былааннарын толорууга быһаарар оруолу ылара. Манна барытыгар сүдү суолталаах дьонунан суоппардар буолаллара саарбаҕа суох.
Онон урукку кэмҥэ суол-иис куһаҕаныгар, сибээс суоҕар үлэлээбит суоппардары үйэтитэн, ахтыы хомуурунньуга диэн тиһиллэн күн сирин көрдө. Кинигэҕэ киирбит суоппардар үөрэ-көтө кинигэлэри бэлэх туттулар.
Тэрээһиммит үөрүүлээх чааһын кинигэ туһунан иһитиннэриини оҥорон саҕалаата “Өлтөх суоппардара” ахтыы хомуурунньугун үлэлэһэн, сурукка-бичиккэ түһэрэн бэчээттэтэн таһааттарбыт Майя Иннокентьевна Аржакова.
Эҕэрдэ тылларын эттилэр: Өлтөх нэһилиэгин Аҕа баһылыга Константин Анатольевич Алексеев, Афанасий Прокопьевич Петров аатынан Бэйдиҥэтээҕи норуот айымньытын киинин директора Игнатий Васильевич Слепцов, Саха Өрөспүүбүлүкэтин тыатын хаһаайыстыбатын үтүөлээх үлэһитэ, муниципальнай сулууспа туйгуна Николай Николаевич Сивцев, Өлтөх нэһилиэгин бочуоттаах олохтооҕо Никифор Петрович Пестряков, кинигэ редактора Анастасия Иннокентьевна Варламова, Бэйдиҥэтээҕи модельнай библиотека сэбиэдиссэйэ Матрена Иннокентьевна Никонова, Өлтөх нэһилиэгин музейын үлэһитэ Ульяна Ивановна Охлопкова, Өлтөх нэһилиэгин баһылыгын солбуйааччыта Алла Андреевна Местникова, Өлтөх нэһилиэгин экономиһа Люция Ивановна Соловьева.
Бу үөрүүлээх быһыыга-майгыга Өлтөх нэһилиэгин Аҕа баһылыга Константин Анатольевич Майя Иннокентьевнаҕа “За вклад в развитии культуры Ольтехского наслега” знак туттарда.
Тэрээһини иилээн-саҕалаан ыытта Валентина Лугинова, ылбаҕай ырыаларынан киэргэттилэр Любовь Стручкова, Ольга Колодезникова, Саина Григорьева, Иван Румянцев, Игнатий Слепцов, истиҥ үҥкүүлэри толордулар “Тэтим” үҥкүү бөлөҕө, Мария Копырина уонна Мария Александрова тойугунан киэргэттэ.
Ыраах олорор суоппардарга кинигэни аймахтарыгар тиксэриэхпит. Барыта 100 экземпляр, онтон ордубутун оҕолоро, аймахтара кулууптан кэлэн атыылаһыаххытын сөп, кинигэ сыаната 500 солк. 89142358171 — Майя Иннокентьевна нүөмэригэр эрийэн билсиҥ.