Уус Алдан улууһун Өлтөх нэһилиэгэр Азия оонньууларын чемпиона, үс төгүллээх Азия призера, Аан дойду кубогын боруонса призера, үс олимпиада кыттыылааҕа, Кыргызтан Өрөспүүбүлүкэтин спортка үтүөлээх маастара, Саха Өрөспүүбүлүкэтин киэн туттуута Айаал Лазарев ыалдьыттаан ааста.
Айаал Лазарев өрүү бастыҥ дьонноох Өлтөх нэһилиэгин дьонун-сэргэтин кытары көрүстэ, кэпсэттэ, бары билэрбит курдук кини тренерынан, наставнигынан, биһиги биир дойдулаахпыт, Арассыыйа бастыҥ тренера Иван Николаевич Сивцев буолар.
Тэрээһин саҕаланыытыгар күн күбэй ийэлэр, эбээлэр, кэлбит ыалдьыттары боҕуруоскай отунан арчылаан, арыылаах алаадьынан айах тутан көрүстүлэр.
Аан тылы Саха Өрөспүүбүлүкэтин муниципальнай сулууспа туйгуна, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Өлтөх нэһилиэгин депутата, Николай Николаевич Сивцев тыл этэн арыйда.
Салгыы Айаал Лазарев мустубут дьоҥҥо, эдэр ыччаттарга бүгүҥҥү көрсүһүү ханнык тэтиминэн ыытылларын, туох сыалтан кэлбитин туһунан ыйда.
Уус Алдан муниципальнай тэриллиитин спорт отделын салайааччыта Алексеев Евгений Петрович эҕэрдэ тыл эттэ, улуус аатыттан эҕэрдэ суруктары, сэмэй бэлэхтэри туттарда.
Арыылаах кырачаан уолаттара «Ат сүүрдээччилэр» диэн Александра Афанасьевна Саввина туруоруутугар үҥкүүлээн көрдөрдүлэр.
А.Н.Жирков аатынан Бэйдиҥэ орто оскуолатын «Тэтим» үҥкүү бөлөҕө аныгылыы үҥкүүнү бэлэх уунна.
Мүрү маҥнайгы нүөмэрдээх оскуолатын үөрэнээччитэ, көрөөччү быһыытынан кэлбит тустууга дьарыктанар Старостин Егор «Бастыҥ бөҕөс» диэн ырыаны олус бэрткэ толордо.
Бүгүҥҥү тэрээһиҥҥэ Бороҕонтон Мүрү I, II нүөмэрдээх оскуола үөрэнээччилэрэ, Мындааба спортивнай оскуолатыттан, Өлтөх оскуолатын үөрэнээччилэрэ кыттыыны ыллылар, спортка сыһыаннаах тустуунан дьарыктанар, тустууну сэргээччилэргэ Айаал Лазарев бэйэтин анал приемнарын оҥорон көрдөрдө, билсиһиннэрдэ, тустуу күрэҕин эт-хаан, уйулҕа өттүгэр хайдах долгуйууттан ааһар туһунан сүбэлэрин үллэһиннэ.
Тэрээһиммит иккис чааһынан спорду сэҥээрээччилэри кытары көрсүү, кэпсэтии ыытылынна, дьэ манна Айаал Лазарев кыра сааһыттан спорт эйгэтигэр туох ыарахаттары көрсүбүтүн, киниэхэ биир дойдулаахпыт, тренер, наставник быһыытынан Иван Николаевич Сивцев туох үтүөнү оҥорбутун, убайдыы-аҕалыы сыһыанын, улахан биллэр Аан дойду таһымнаах тренердары кытары хайдах алтыһан, маннык улахан сүдү ситиһиилэри дабайбыттарын барытын уот харахха арылыччы кэпсээтэ, сырдатта. Дьэ кырдьык да Айаал Лазарев аҥаардас спорт эрэ өттүгэр буолбакка, кини хайдах курдук сахалыы уус тыллааҕын, хайдах курдук киһи истэн эрэ олоруох курдук ылыннарыылаах кэпсээнин, олоҕун олук түгэннэрин тус бэйэтиттэн истэн элбэҕи биллибит.
Кэпсэтии кэннэ Өлтөх нэһилиэгин баһылыгын солбуйааччы Ирина Спартаковна Местникова, А.Н.Жирков аатынан Бэйдиҥэ орто оскуолатын директора Елена Александровна Дансарунова эҕэрдэ тыл эттилэр, сэмэй бэлэхтэрин туттардылар.
Түмүккэ Николай Николаевич Сивцев, Сивцевтар бииргэ төрөөбүттэр ааттарыттан тыл эттэ уонна биир убаһаҕа сертификат туттарда.
Дьэ бу курдук сүдү киһи, биһиги дойдубутугар мааны ыалдьыт буолан кэлэн барбытыттан сүргэбит көтөҕүлүннэ.
Сонуннарга анаан Өлтөх олохтоох прессата.
