«Айан аргыстаах, суол доҕордоох»
Уус Алдан улууһун Өлтөх нэһилиэгин Бэйдиҥэ бөһүөлэгэр, Арассыыйаҕа дьиэ кэргэн сылынан, Саха Өрөспүүбүлүкэтигэр оҕо, Уус Алдан улууһугар аҕа сылынан үйэ аҥаарын устата суоппарынан үлэлээн кэлбит, Өлтөх нэһилиэгин солбуллубат суоппара Алексеев Спиридон Николаевиһы сыралаах үлэтин бэлиэтээһин үтүө-мааны күнэ суоппар күнүгэр сөп түбэһиннэрэн «Айан аргыстаах, суол доҕордоох» диэн тэрээһин ыытылынна.
50 сыл усталаах туоратын тухары хас эмит тыһыынчанан киһини таспыта, тыһыынчанан килэмиэтири айаннаабыта буолуой.
Спиридон Николаевич түргэн туттунуулаах, сыыдам сырыылаах Өлтөх нэһилиэгин биир төһүү суоппара буолар, олоҕун тапталлаах идэтигэр анаабыт, күн бүгүн да олохтоох дьаһалтабыт суоппара буолар. Үйэ аҥаардаах үлэтин сыаналаан олохтоох дьаһалта, чугас дьоно анал бэлиэ күнү бэлэхтээтилэр. Алгыс тыл мааныта, эҕэрдэ тыл эгэлгэтэ этилиннэ, Саха Өрөспүүбүлүкэтин транспортка уонна суол хаһаайыстыбатын министиэристибэтиттэн «Почетный работник автомобильного транспорта Республики Саха (Якутия)» диэн анал бэлиэнэн наҕараадаланна.
Бэйдиҥэ бөһүөлэгин актовай саалатыгар дьон-аймах тоҕуоруһа муһунна, «Удьуор утум» массыыналаах эр дьон уолаттарынаан күрэхтэрэ үрдүк таһымнаахтык ыытылынна. Бу күрэххэ аҕалар уолаттарын кытта кыттыбыттара олус кэрэхсэбиллээх буолла. Күрэх 7 түһүмэҕинэн ыытылынна. Барыта 5 ыал аҕата уолаттарын кытта бэйэлэрин сатабылларын, билиилэрин тургутан көрдүлэр.
1 түһүмэх массыынаны киэргэтэн аҕалыы.
2 түһүмэх канистраттан бириэмэҕэ уу кутуу.
3 түһүмэх суол быраабылатынан тургутук.
4 түһүмэх сиэркилэннэн хаамыы.
5 түһүмэх көлүөһэни бириэмэҕэ эргитэн аҕалыы.
6 түһүмэх массыына көрбүрээтэрин ыһыы, хомуйуу.
7 түһүмэх көлүөһэ устуу, төттөрү кэтэрдии.
Кыттааччылар бары да тэҥ көрдөрүүнү олохтоотулар.
Муҥутуур кыайыылааҕынан Саввинов Александр уолунаан Вадимныын ааттаннылар.
Иккис миэстэ Крылов Тимофей уолунаан Айыллааныын.
Үһүс миэстэ Белов Айсен уолунаан Стастыын буоллулар.
Лугинов Александр уонна Сыроватский Иван поощерительнай бириис ыллылар.
Наҕараада кэннэ Арыылаахтар ааттарыттан биир куул собо оонньонно, кыттыбыт уолаттар биирдии талоны ыллылар, биир куул собо Сыроватскай Айхалга тигистэ.
Күрэх кэннэ кыттааччылары кытары уопсай хаартыскаҕа түһүү олохтонно. Салгыы да маннык тэрээһиннэр тиһигин быспакка ыытылла туралларыгар баҕарыллар.
Сонуннарга анаан Өлтөх олохтоох прессата.
