Субуотаҕа, 14.02. Арыылаах бөһүөлэгэр «Эйгэ» сынньалаҥ киин иҺинэн тэриллибит, «Саха эйгэтэ» түмсүү төрөөбүт тыл күнүгэр, П. П. Пестряков аатынан Орто-Эбэ сүрүн оскуолатын үөрэнээччилэригэр, учууталларыгар, төрөппүттэригэр аналлаах тэрээһин ыыттыбыт. Саха тылын учуутала Говорова Н. А. кылгас киирии тылыгар түмсүү чилиэттэрин, үлэ сыалын билиһиннэрдэ. Салгыы үлэ бэтэрээнэ, нэһилиэк биир саамай көхтөөх киһитэ, кинигэни таптаан ааҕааччы Докторова А. И. кинигэни ааҕыы киһи олоҕор суолтатын туһунан, бэйэтин олоҕун холобуругар олоҕуран кэпсээтэ. Аан дойдутааҕы «Кинигэ бэлэхтиир күҥҥэ» сөп түбэһиннэрэн, оскуола бибилэтиэкэтигэр 3 кинигэни бэлэхтээтэ. Ол курдук, биир дойдулаахпыт, биллэр хайыһардьыт Данилов Константин Иванович туһунан уонна Анна Ивановна сиэнигэр анаммыт хоһоон хомуурунньугун бибилэтиэкэр Жиркова Т. В. туттарда.
Оҕо кинигэни ааҕарын көҕүлүүр сыалтан, олунньу ыйтан- үөрэх дьыла бүтүөр диэри элбэх кинигэни аахпыт оҕоҕо «Саха эйгэтэ» түмсүү бириис олохтуурун туһунан иһитиннэрдибит.
Салгыы өбүгэ оонньуутун тарҕатааччы, нэһилиэк бастыҥ оонньооччута Охлопкова Н. И. хабылык, хаамыска оонньуутугар маастар кылаас көрдөрдө, ыйытыыларга эппиэттээтэ. Оҕолор сонурҕаан көрдүлэр, оонньуу быраабылатын, ирдэбилин билистилэр.
Түмүктүүр чааһыгар түмсүү чилиэттэрэ астаан аҕалбыт астарын: алаадьы, саламаат, хаан, дырыһааҥкы, сыр, быырпах амсайдылар. Оҕолор өбүгэ аһын арааһын көрөн, доруобуйаҕа туһатын билэн тарҕастылар.
