Арыылаахтааҕы «Эйгэ»сынньалаҥ киинигэр Аан дойду дьахталларын күнүнэн Өлтөх нэһилиэгин кэрэ аҥардарын итиитик-истинник эҕэрдэлээн туран тэрээһиннэр бэрт сэргэхтик аастылар. Ол курдук кулун тутар 8 күнүгэр бырааһынньыктааҕы «СААСКЫ ЭҔЭРДЭЛЭР» остуол тула араас конкурстар, оонньуулар, мини-лотерея ыытылынна. Далбар Хотуттар минньигэс бүлүүдэлээх, бириистээх кэлэн бэйэ бэйэни кытта көрсөн кэпсэтэн, эҕэрдэлэһэн, үөрэн-көтөн, сэргэхсийэн, хаартыскаҕа түһэн тарҕастыллар. Салгыы кулун тутар 10 күнүгэр Өлтөх нэһилиэгин тэрилтэлэрин кэрэ аҥардара спорт түһүлгэтигэр көрүстүлэр. Хамаандалар 5-тии кэрэ аҥаар ирдэнэн (ол иһигэр биир кыттааччы 50+ саастаах буолуохтаах) Дартс, Корнхол, Көрдөөх эстафета ыытылынна. Күрэҕи нэһилиэк спортинструктара Леонид Марков сүрүннээн ыытта. Түөрт тэрилтэ кыттан бастакы миэстэни П.П.Пестряков аатынан Орто-Эбэ сүрүн оскуолатын (директор Саввина Н.Н.), иккис миэстэни Орто -Эбэ анал коррекционнай интернат- оскуолатын (директор Колодезникова Н.К.), үһүс миэстэни Арыылаахтааҕы «Кэнчээри» оҕо уһуйаанын (сэбиэдиссэй Бурнашева А.Д.), төрдүс миэстэ А.Н.Жирков аатынан Бэйдиҥэ орто оскуолатын (директор Дансарунова А..А.) кэрэ аҥардара ылары ситистилэр. Бары көхтөөхтүк кыттан тэбис тэҥник араа-бараа кииристилэр. Көрдөөх эстафета сонун түһүмэхтэригэр бириэмэҕэ сүүрэн күрэхтэһии тыына сытыырхайан илин-кэлин түсүһүү быһаарылынна. Күрэхтэһии түмүгүнэн «Эйгэ» с.к. коллектива олохтообут грамоталарынан уонна кубоктарынан наҕараадаланнылар. Далбар Хотуттар, кэрэ аҥардар бу курдук куруутун көхтөөх, үөрэ-көтө, сэргэхтик сылдьан, кыттан нэһилиэкпит олоҕун тупсара туруоҕун!
