«Ньургуһун» түмсүү Уус Алдан улууһун Өлтөх нэһилиэгэр, Бэйдиҥэ бөҺүөлэгэр ыалдьыттаата Сахабыт сирин тыйыс тымныыта сатыылаан турар кэмигэр Дьокуускай куораттааҕы “Арчы Дьиэтэ” айылгы киинин иһинэн тэриллибит тоҥ буору тобула үүнэн тахсар сибэкки аатынан ааттаммыт «Ньургуһун” түмсүү Сахабыт сирин биир талба сиригэр, Уус Алдан улууһун Өлтөх нэһилиэгин Бэйдиҥэ бөһүөлэгэр ырыа-тойук аргыстаах «Кэрэни кэрэхсээн» кэнсиэри көрдөрдө. Саала иһин көрөөччү толордо, бука бары сүргэлэрэ көтөҕүллэн, үөрэн-көтөн тарҕастылар. Ол курдук, хас биирдии «Ньургуһун»түмсүү кыттааччытын хабыллар ытыстарын тыаһынан көрүстүлэр. Кэнсиэри “Арчы Дьиэтэ” айылгы киинин фольклорга испэсэлииһэ, СӨ култууратын туйгуна, “Ньургуһун” түмсүү салайааччыта Петр Кычкин-Сайылык Бүөтүрэ иилээн-саҕалаан ыытта. Дьоро түһүлгэ саҕалана илигинэ аан бастакынан ансаамбыл ырыаһыттара бука бары тахсан, норуот уостан түспэт «Харалдьыкка сааһын аайытын тыллар…» диэн тыллартан саҕаланар ыллам ырыаны толорон, Бэйдиҥэ олохтоохторун үөртүлэр. Салгыы, соторутааҕыта түмсүү иһинэн тэриллибит «Иэйии Куо» (Уран Күннэй, Чугдаара, Сулус Куо) трио кыргыттара Далаана репертуарыттан “Кэрэ Куо” ырыаны нарын куоластарынан ыллаан эйээриттилэр. Кинилэр кэнсиэркэ үс нүөмэри көрдөрдүлэр. Ол курдук, бөлөх биир чаҕылхай хоһоонньута Уран Күннэй тылларыгар, Сион матыыбыгар “Саҥа Дьыл” ырыаны, ол кэнниттэн кыргыттар үһүөн бэйэлэрэ айбыт хоһоонноругар, бөлөх өссө биир кыттааччыта Ираида Коркина-Чугдаара дьүрүлүгэр “Айар куттаах дьүөгэлэрим” ырыаны толордулар. Ол кэнниттэн, Күннэйдээх Сулус Куо бэйэлэрэ туспа дуэтынан тахсан, Анастасия Варламова хоһоонугар, дьүрүлүгэр «Оҕо саас» айымньытын тэтимнээхтик ыллаан иһитиннэрдилэр. Маны таһынан, Ньургуйаана-Сулус Куо Сайылык Бүөтүрүнээн Далаана репертуарыттан «Билиниэм этэ» ырыаны дуэттаан толордулар. Кэнсиэрт устатын тухары ансаамбыл чаҕылхай ырыаһыттара биирдиилээн тахсан ырыаны ымыы гынан көтүттүлэр. Түмсүү салайааччыта, ыытааччы Петр Кычкин-Сайылык Бүөтүрэ, А.П. Петров аатынан Бэйдиҥэтээҕи норуот айымньытын киинин салайааччыта Игнатий Слепцов-Хайа Тыала, хоһоонньут кыргыттар Ираида Коркина-Чугдаара, Ньургуяна Сметанина-Сулус Куо; невролог идэлээх, хоһоонньут, бэйэтин ааптарыскай ырыаларын толорооччу Елена Черепанова-Дойдулаана, хоһоонньут, нарын куоластаах Сардаана Кривогорницына, эдэркээн ырыаһыт, ааптарыскай ырыаларын толорооччу Виталий Семянов ураты толорууларынан, сэргэх матыыптаах айымньыларынан киэргэттилэр. Маны сэргэ, кэнсиэр кэмигэр сыаҥка, монолог даҕаны баар буолла. Ол курдук, түмсүү ырыаһыттара Надежда Барабанова-Эрэл, Сайылык Бүөтүрэ уонна Елена Черепанова-Дойдулаана буоланнар көрөөччүлэри күллэрэн, көрүдьүөс туруорууну көрдөрдүлэр. Оттон ансаамбыл биир эрэллээх, дэгиттэр талааннаах кыттааччыта Надежда Барабанова-Эрэл бэйэтэ айбыт монологун ааҕан иһитиннэрдэ. Уус Алдан улууһун Бэйдиҥэ олохтоохторо “АрчыДьиэтэ” айылгы киинин иһинэн тэриллибит «Ньургуһун” түмсүү сэргэх кэнсиэрин сүрэхтиин сөбүлээбиттэрэ биллэн, ытыстарын тыаһын кэмэ суох бэлэхтээн, үөрэн-көтөн, махтанан, сорохторо Сайылык Бүөтүрэ ыыппыт оонньуутугар кыттан, өттүк харалаах, бириистээх тарҕастылар.
_Бэйэ кэрэспэдьиэнэ_
