А.П.Петров аатынан Бэйдиҥэтээҕи норуот айымньытын киинигэр, тохсунньу ый 30 күнүгэр Өлтөх нэһилиэгин Бэйдиҥэ бөһүөлэгэр, доруобуйаларынан хааччахтаах дьон табаарыстыы көрсүһүүлэрэ буолан ааста. Олохтоохтор ыалдьыттары боҕоруускай отунан, арыылаах алаадьынан айах тутан көрүстүлэр. Өлтөх нэһилиэгин Аҕа баһылыга Константин Анатольевич Алексеев, «Дьулуур» түмсүү салайааччыта Елена Иннокентьевна Сивцева эҕэрдэ тыл эттилэр. Спортинстуктор Леонид Егорович Марков дартс, корнхол, эстафета күрэхтэһиилэрин ыытта, сүрдээх көхтөөх тэрээһин буолла. Манна Байаҕантай, Баатаҕай, Бэрт-Ууһун, Мүрү нэһилиэктэриттэн кэлэн кыттыыны ыллылар. Ирэ-хоро кэпсэтэн-ипсэтэн, тыл этэн, күрэхтэһэн, үҥкүүлээн, ыллаан, күрэхтэһиилэр түмүктэринэн наҕараадаланан, кэлбит дьон астынан бардылар. Барыта биэстии киһилээх 4 хамаанда кытынна. Дартс күрэҕэр 1 миэстэни «Дьулуур» Өлтөх хамаандата ылла. 2 миэстэни «Сардаҥа» Баатаҕай хамаандата ылла. 3 миэстэни ылла «Айтал» Байаҕантай хамаандата. Кэрэ аҥардарга 347 очколаах Александра Новгородова абсолютнай кыайыылаах буолла. Күүстээх аҥардарга 384 очкону ылан Николай Данилов кыайыылаах буолла. Корнхол күрэҕэр 1 миэстэ «Дьулуур» Өлтөх хамаандата, 2 миэстэ «Сардаҥа» Баатаҕай хамаандата. 3 миэстэ «Айтал» Байаҕантай хамаандата. Кэрэ аҥардарга 27 очкону ылан Прасковья Слепцова абсолютнай кыайыылаах буолла. Күүстээх аҥардарга 29 очколаах Григорий Егоров абсолютнай кыайыылаах буолла. Уонна эстафета түмүгүнэн 1 миэстэни Өлтөх хамаандата ылары ситистэ, 2 миэстэни Бэрт Ууһун хамаандата ылла. 3 миэстэни Баатаҕай хамаандата ылла Уопсай түмүккэ «Дьулуур» Өлтөх нэһилиэгин хамаандата кыайыылааҕынан таҕыста уонна кубогынан, күрэхтэһиилэргэ кыттыбыт кыайыылаах хамаандалар мэтээллэринэн наҕараадаланнылар Бары тэрээһиҥҥэ кэлэн кыттыбыттарга, тэрийсибит дьоммутугар махталбытын биллэоэбит.
